उहाँका अनुसार चक्रवात आउँदाआउँदै न्यूनचापीय क्षेत्रमा परिणत हुँदै कमजोर हुने सम्भावना देखिन्छ । यसले गर्दा बिहीबार रातिबाट सिमसिमे पानी परे पनि खोलानालामा बाढी आउने सम्भावना भने देखिँदैन तर पहिरो र हिमपातको जोखिम रहेका कारण सतर्क रहन भने जरुरी छ । जल तथा मौसम विज्ञान विभाग मौसम पूर्वानुमान महाशाखाका अनुसार ‘अर्णव’ चक्रवातका कारण सुदूरपश्चिम प्रदेशमा शुक्रबार र शनिबार दार्चुला, बझाङ र बाजुरामा भने हिमपातको सम्भावना रहेको छ । हिमपातका कारण चिसो अत्यधिक बढ्ने भएका कारण यी तिनै जिल्लालाई सुन्तला रङले सङ्केत गरी सतर्क रहन आग्रह गरिएको छ । यस्तै तराईका कैलाली, कञ्चनपुर र पहाडी जिल्ला डोटी, अछाम, डडेलधुरा तथा बैतडीलाई पहेँलो रङले सङ्केत गरिएको छ । यी जिल्लालाई भने अद्यावधिक रहन आग्रह गरिएको छ ।  चक्रवातको प्रभावले गर्दा प्रदेशको हिमाली क्षेत्रमा हिमपात हुने र त्यसले गर्दा जनजीवन प्रभावित हुन सक्ने भएकाले तीन जिल्लालाई सतर्कताको सूचीमा राखिएको इन्जिनियर साहको भनाइ छ । ‘अर्णव’ चक्रवातको प्रभावका कारण सुदूरपश्चिम प्रदेशमा उत्पन्न हुन सक्ने विपत् जोखिम न्यूनीकरणका लागि प्रदेश सरकार तयारी अवस्थामा रहेको छ ।

यसबारे निरन्तर सूचना प्रवाह गरिनुका साथै हुन सक्ने जोखिम न्यूनीकरणका लागि सम्पूर्ण युनिटलाई तयारी अवस्थामा राखेको आन्तरिक मामिला तथा कानुनमन्त्री खुसीराम डगौरा थारूले बताउनुभयो । उहाँका अनुसार सरकारले पूर्ण रूपमा तयारी गरेको छ । सम्पूर्ण जिल्लाका सरोकारवाला निकायलाई सतर्क रहनका लागि निरन्तर सूचना प्रवाह भइरहेको छ ।