भारतको अहिलेसम्मकै ठूलो जित
काठमाडौं । भारतले टी-२० विश्वकप क्रिकेटमा आफ्नो अहिलेसम्मकै ठूलो जित हासिल गरेको छ। बिहीबार नयाँ दिल्लीमा भएको खेलमा भारतले नामिबियालाई ९३ रनको फराकिलो अन्तरले पराजित गरेको हो। पहिले ब्याटिङ गरेको भारतले निर्धारित २० ओभरमा २०९ रनको विशाल योगफल तयार पारेको थियो।
भारतका लागि इशान किशनले आक्रामक सुरुवात गर्दै मात्र २० बलमा अर्धशतक पूरा गरे। त्यस्तै, हार्दिक पाण्ड्याले पनि उत्कृष्ट प्रदर्शन गर्दै २७ बलमा अर्धशतक प्रहार गरे। एक समय भारतले ३०० रन बनाउने सम्भावना देखिए पनि नामिबियाका कप्तान गेरहार्ड इरास्मसले उत्कृष्ट बलिङ गर्दै भारतलाई रोकेका थिए।
इरास्मसले ४ ओभरमा २० रन दिएर ४ विकेट लिए। भारतले इनिङ्सको अन्तिम ११ बलमा मात्र ४ रन जोड्दा ५ विकेट गुमाएको थियो, जसले गर्दा स्कोर २०९ मा सीमित भयो। २१० रनको विशाल लक्ष्य पछ्याएको नामिबियाले भारतीय बलरसामु खुलेर खेल्न सकेन। स्पिनर वरुण चक्रवर्तीले खेलको आठौँ ओभरमा बलिङ गर्न आउनासाथ खेलको रूप नै बदलिदिए। उनले आफ्नो पहिलो १० बलभित्रै ३ विकेट लिएर नामिबियाको ब्याटिङ लाइन ध्वस्त पारे।
ब्याटिङमा अर्धशतक बनाएका हार्दिक पाण्ड्याले बलिङमा पनि २ विकेट लिए। बिरामी भएर निको भएपछि टोलीमा फर्किएका जस्प्रित बुमराहले पनि उत्कृष्ट योर्कर फ्याँक्दै विकेट लिए। अन्ततः नामिबिया लक्ष्यभन्दा धेरै टाढा रहँदै पराजित भयो।
