काठमाडौं । नेपाली कांग्रेसका महामन्त्री गगन थापाले पार्टीमा कोही मालिक कोही दास नहुने बताएका छन्। विशेष महाधिवेशनको उद्घाटन समारोहलाई सम्बोधन गर्दै पार्टी सभापतिदेखि सदस्यसम्म सबैको हैसियत बराबर हुने बताए।

उनले भने, ‘पार्टीको सदस्यहरूले आफ्नो हकको दाबी गरेको हो यो। आजबाट कांग्रेसमा लामो समयदेखि जाम भएर बसेको, पार्टी सञ्चालनको जुन तरिका थियो। त्यो भत्कियो, भोलि जोसुकै आओस्, पार्टीको सदस्यलाई कसैले हेप्न सक्दैन।’

उनले भने, ‘तपाईंहरूले जहाँ लगेर टुङ्ग्याउनुहुन्छ । त्यसमा केही पनि आपत्ति छैन । जति गर्नुभएको छ मेरो लागि ठूलो छ । तपाईंहरूको यो प्रयासले कांग्रेस दास र लाशहरूको पार्टी होइन, जिउँदो मानिसहरूको पार्टी हो । ‘कांग्रेसमा कुनै बा छैन बोल्दै गर्दा नबोल भन्ने ।’

उनले भने, ‘नेपाली कांग्रेसमा ‘बा’ छैनन् । प्रश्न गर्न पाइन्छ । हाम्रो कांग्रेसमा प्रश्न मर्न दिँइदैन ।’ थापाले विशेष महाधिवेशनको बन्द सत्रले जे गर्छ त्यो स्वीकार्न तयार रहेको बताए । थापाले पार्टीभित्र देखिएको वर्तमान अवस्थालाई ‘झगडा’ हाेइन विचारको संघर्ष भएकाे बताए ।

उनले भने, “कतिलाई बाहिरबाट हेर्दा नेपाली कांग्रेसभित्र झगडा भइरहेको जस्तो पनि लागेको होला । तर कुरा त्यो होइन । यो संघर्ष नै हो । तर यो शक्तिको संघर्ष होइन, विचारको संघर्ष हो ।”

कमजोरी दोहोरिन नदिने विश्वप्रकाशको संकल्प

अर्का महामन्त्री विश्वप्रकाश शर्माले पार्टीले गरेका कमजोरी र पार्टीभित्र रहेका समस्याको समीक्षा गर्दै आगामी दिनमा त्यस्ता कमजोरी दोहोरिन नदिने संकल्प गर्न विशेष महाधिवेशन आयोजना गरिएको बताएका छन् ।