काठमाडौं । ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ का संयोजक दुर्गा प्रसाईंले पूर्वराजा ज्ञानेन्द्र र उनका समथर्कहरूप्रति रिसाएर आक्रोश पोखेका छन् । आज भक्तपुरमा आयोजित पत्रकार सम्मेलनमा प्रसाईले भने, ‘राजाका मान्छे चार जना बाटोमा उफ्रिने, तर एउटा राजाको विज्ञप्ति पनि आउँदैन। राजा गएर दमकको चिया बगानमा घाम तापेर बस्ने ?’

‘हिजो पृथ्वीनारायण शाह पनि त हातमा खुकुरी लिएर निस्किएर पो राजा भएका हुन् त। राजाको पनि त केही न केही त हुनुपर्यो नि त, जोड हुनुपर्यो, घटाउ हुनुपर्यो, बल हुनुपर्‍यो’, प्रसाईंले भने।

प्रसाईंले राजसंस्था फर्काउने अन्तिम र सुरक्षित विकल्प ‘जनमत संग्रह’ भएको बताउँदा राजावादीहरूले नै आफ्नो विरोध गरेकोमा आपत्ति जनाए। उनले भने, ‘संसदबाट फ्याँकेको राजा संसदबाटै (दुई तिहाइले) ल्याउनुपर्छ, होइन भने लडाइँ गर्न सबै सडकमा निस्किनुपर्‍यो। कोही ननिस्किने, म एक्लैले बल गर्दा हुन्छ ? अनि मैले जनमत संग्रहको कुरा गर्दा राजा छोडेको हुन्छ ?’

उनले भने, ‘त्यत्रो राजालाई मन पराएको छ भने, हिन्दु राष्ट्र चाहिएको छ भने, हालौँ न ब्यालेट बक्स। ड्याम-की-ड्याम ९५ पर्सेन्ट भोट हालेर ल्याउ न त राजालाई।’ प्रसाईंले आफू ३ वर्षदेखि राजा र हिन्दु धर्मको पक्षमा लडिरहेको, जेल बसेको तर अन्य राजावादी दल र नेताहरूले केही नगरेको दाबी गरे। उनले भने, ‘राजा ल्याउनको लागि लडेकै हो नि, जेल बसेकै हो त। कोही नगर्ने, अनि अहिले आएर विरोध गर्ने ?’ प्रसाईंले आफूले राजाको मुद्दा नछोडेको तर राजा र राजावादीहरूले पनि आन्दोलनलाई साथ दिनुपर्ने र निष्क्रिय भएर बस्न नहुने स्पष्ट पारे।