मलेसियालाई ९ विकेटले हराउँदै नेपाल एसिसी प्रिमियर कपको फाइनलमा
काठमाडौं । नेपाल संयुक्त अरब इमिरेट्स (यूएई) मा जारी एसिसी पुरुष यू–१९ प्रिमियर कप क्रिकेट प्रतियोगिताको फाइनलमा प्रवेश गरेको छ । अजमान मैदानमा आज भएको सेमिफाइनलमा मलेसियामाथि ९ विकेटको सानदार जित दर्ता गर्दै नेपालले फाइनलमा स्थान सुरक्षित गरेको हो । यो जितसँगै नेपाल यू–१९ एसिया कपका लागि पनि छनोट भएको छ ।
मलेसियाले दिएको ५२ रनको सामान्य लक्ष्य नेपालले ७.५ ओभरमा १ विकेट गुमाएर सहजै पछ्यायाे । नेपालका लागि वंश क्षेत्रीले २७ बलमा २३ रन र निश्चल क्षेत्रीले १८ बलमा १५ रन बनाएर नेपाललाई जिततर्फ डोर्याएका हुन्। यसअघि, ओपनिङमा आएका निरज कुमार यादव ४ रनमा उट भएका थिए।
त्यसअघि टस हारेर पहिला ब्याटिङ गरेको मलेसिया १७.२ ओभरमा ५१ रनमा अलआउट भएको थियो । मलेसियाका लागि हमजाह पङ्गीले १३, मुहम्मद फतुल मुइनले ११ रन जोडेपनि अन्य ब्याटरले दोहोरो अङ्कमा रन जोड्न सकेनन् ।
नेपालका नितिसकुमार पटेलले चार विकृट लिँदा चन्दन रामले तीन, कप्तान अशोक धामी, रोशन विश्वकर्मा र अपराजित पौडेलले १/१ विकेट लिए । नेपाल समूह ‘ए’ को र मलेसिया समूह ‘डि’का विजेताका रुपमा सेमिफाइनलमा पुगेका हुन् ।
