काठमाडाैं । नेपाली कांग्रेसका महामन्त्री गगन थापाले पार्टीको आगामी निर्वाचन वर्तमान सभापति शेरबहादुर देउवाको हस्ताक्षरमा नभई विशेष महाधिवेशनबाट निर्वाचित नयाँ सभापतिको हस्ताक्षरमा लड्ने कुरा स्पष्ट पारेका छन् ।

सामाजिक सञ्जालमार्फत महामन्त्री थापाले आफ्ना साथीहरूबाट बारम्बार सोधिएको प्रश्नको जवाफ दिँदै पार्टीको भावी कार्यदिशामा कुनै अलमल नरहेको दाबी गरेका हुन् । थापाले आफूहरूले निर्वाचनको मितिभन्दा पहिले नै महाधिवेशनको माग गर्नुको मुख्य कारण पनि यही भएको उल्लेख गरेका छन् । उनले भनेका छन्, “अब विशेष महाधिवेशनको विकल्प छैन। कुरा स्पष्ट छ, अलमलमा नपरौं।”

उनले भनेका छन्- ‘बिहानदेखि धेरै साथीहरूले सोधिरहनुभएको छ ‘पार्टीले वर्तमान सभापतिज्यूकै हस्ताक्षरमा चुनाव लड्ने भएको हो? मैले भने; होइन। साथीहरूले फेरी सोध्नुभयो कसरी? मैले भने; प्रष्ट छ – अब विधान बमोजिम समयभित्रै विशेष महाधिवेशन हुन्छ। त्यहीँबाट नयाँ सभापतिको निर्वाचन हुन्छ। नयाँ सभापतिको हस्ताक्षर सहित निर्णय सच्चिएर निर्वाचन आयोगमा जान्छ। नयाँ नीति र नेतृत्वसहित त्यही हस्ताक्षरमा पार्टी चुनाव लड्छ।’