काठमाडौं । डा.  बाबुराम भट्टराई संरक्षकत्वको नेसपा नयाँ शक्ति, जनार्दन शर्मा नेतृत्वको प्रगतिशील राष्ट्रिय अभियानलगायतको एकताबाट ‘प्रगतिशील लोकतान्त्रिक पार्टी’ घोषणा भएको छ ।

राष्ट्रिय सभागृहमा आइतबार आयोजित विशेष समारोहका बीच नयाँ पार्टी गठनको घोषणा भएको हो । नवघोषित पार्टीको चुनाव चिह्न आँखा रहनेछ । साथै, नीलो पृष्ठभूमिमा आँखा अंकित झण्डा रहने घोषणा समेत गरिएको छ ।

प्रगतिशील लोकतान्त्रिक पार्टीले आफ्नो वैचारिक आधारलाई ‘विकसित विज्ञानमा आधारित समाज विकासको नवीनतम् सिद्धान्त अनुरूपको नेपाली समाजवाद’ भनेर परिभाषित गरेको छ । यसले परिवर्तनलाई शाश्वत मान्ने बुद्ध दर्शनलाई आत्मसात् गर्दै मार्क्सको द्वन्द्वात्मक तथा ऐतिहासिक भौतिकवादलाई समेत परिष्कृत गर्ने लक्ष्य राखेको छ ।

प्रतिबद्धतापत्र अनुसार, पुरानो वैचारिक विधिले एक्काइसौं शताब्दीका समस्या समाधान गर्न नसक्ने ठहर गर्दै पार्टीले चौथो र पाँचौं औद्योगिक क्रान्तिका उपलब्धिहरू, जस्तै– क्वान्टम सिद्धान्त, जेनेटिक्स र कृत्रिम बौद्धिकता (एआई) जस्ता ज्ञान-विज्ञानले परिष्कृत मार्क्सवादी दर्शनलाई आफ्नो मार्गनिर्देशक सिद्धान्त बनाउने उल्लेख गरेको छ ।

यसको चरित्र समावेशी र सहभागितामूलक लोकतन्त्रमा आधारित मौलिकतासहितको नेपाली समाजवाद हुने स्पष्ट पारिएको छ । प्रतिबद्धता पत्रमा मार्क्सवाद शब्दावली परे पनि पार्टीले आफूलाई कम्युनिस्ट भनेको छैन । तर, घोषणा सभामा नेता सुदन किराँतीले कम्युनिस्टको खोल छाडेर गुदीलाई आफूहरूँग राखेको बताएका थिए ।

पार्टीले देश र नागरिकप्रति विभिन्न सात बुँदामा आफ्ना मुख्य प्रतिबद्धताहरू व्यक्त गरेको छ ।

देशलाई केही वर्षभित्रै अल्पविकसित मुलुकको समूहबाट बाहिर निकाल्ने, १० वर्षभित्र मध्यम आय भएको देश बनाउने र २५ वर्षभित्र विश्वका विकसित मुलुकको हाराहारीमा पुर्‍याउने महत्त्वाकांक्षी लक्ष्य पार्टीले निर्धारण गरेको छ ।

चौतर्फी भ्रष्टाचारको अन्त्य गर्न “भ्रष्टाचारविरुद्ध युवाशक्ति” (एन्टीकरप्सन युथ फोर्स) गठन गरी शून्य सहनशीलताको नीति अपनाइने पार्टीको प्रतिबद्धता पत्रमा उल्लेख छ ।

आदिवासी जनजाति, खस-आर्य, मधेसी, थारू, महिला, दलित, मुस्लिमलगायत सबै समुदायको समानुपातिक समावेशी सहभागिता, प्रतिनिधित्व र पहुँच स्थापित गरी ‘इन्द्रेणी राष्ट्रियता’ प्रवर्द्धन गरिने उक्त पार्टीले जनाएको छ ।

देशको सार्वभौमिकता र भौगोलिक अखण्डताको रक्षा गर्दै असमान सन्धिहरूको खारेजी, खुला सीमाको व्यवस्थापन र सबैसँग पञ्चशीलका सिद्धान्तका आधारमा सन्तुलित र असंलग्न परराष्ट्र नीति अवलम्बन गरिने प्रतिबद्धता पत्रमा उल्लेख छ ।

पार्टीको मूल लक्ष्य गरिबी बाँड्ने नभई हरेक नागरिकलाई स्वतन्त्र, धनी, खुसी र सम्पन्न बनाउने उद्देश्यसहितको ‘मौलिक समाजवाद’ स्थापना गर्नु रहेको जनार्दन शर्माद्वारा हस्ताक्षरित प्रतिबद्धता पत्रमा जनाइएको छ ।

प्रतिबद्धतापत्रले पुराना दलहरू (नेपाली कांग्रेस, नेकपा (एमाले) र नेकपा (माओवादी केन्द्र)ले ऐतिहासिक योगदान गरे पनि सत्तामा पुगेपछि आफ्नो क्रान्तिकारी छवि गुमाएको, देशलाई भ्रष्टाचार र यथास्थितिमा फसाएको आरोप लगाएको छ ।

यसै पृष्ठभूमिमा सेप्टेम्बर २०२५ मा भएको ‘जेनजी विद्रोह’को बलमा नयाँ राजनीतिक पहलकदमीको आवश्यकता महसुस गरी पार्टी गठन गरिएको दाबी प्रतिबद्धता पत्रमा गरिएको छ ।