काठमाडौं ।  नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले नेता तथा कार्यकर्तालाई सडक आन्दोलनमा उत्रिन नेता र कार्यकर्तासँग आह्वान गरेका छन्।

काठमाडौंमा हिजो शनिबार आयोजित कार्यक्रममा उनले दलित लगायत उत्पीडित समुदायका अधिकार केवल सदनबाट कानुन बनाएर वा निकाय स्थापना गरेर सम्भव नहुने भन्दै जनसंगठन र आन्दोलनमार्फत मात्रै सुनिश्चित हुने बताए।

उनका अनुसार, “अब आन्दोलन नै विकल्प हो। बरु फेरि जेल, नेल र यातना भोग्न तयार हुनुपर्छ।” दाहालले आफ्नो पहिलाको राजनीतिक छवि अहिले जस्तो बलियो नभएको स्वीकार पनि गरे। उनले स्मरण गर्दै भने, “विगतमा म चुनावमा भोट हाल्न जाँदा जनमुक्ति सेनाका दुई गाडी अगाडि–पछाडि हुन्थे। त्यो समयको प्रचण्डप्रति जनताले विशेष बुझाइ राख्थे। अहिले भने त्यो स्थिति छैन।”

तर उनले नयाँ सेना बनाउने वा हिंसात्मक बाटो रोज्ने चाहना आफूले नगरेको स्पष्ट पार्दै शान्तिपूर्ण आन्दोलनमार्फत जनशक्ति जुटाउनुपर्ने बताए। चाडपर्व सकिएपछि पार्टीले सडकलाई मुख्य माध्यम बनाएर अघि बढ्ने योजनामा रहेको उनको भनाइ थियो।