पिएसजीले लिग वानमा अन्जेर्सलाई हरायो
काठमाडौं । फाबियन रुइजको एक मात्र गोलमा पेरिस सेन्ट-जर्मेन (पिएसजी) ले शुक्रवार लिग वानमा अन्जेर्सलाई हराएको छ। पिएसजीले २०२५/२६ लिग वान को पहिलो घरेलु खेलमा अन्जेर्सलाई १-० ले हराउँदै लगातार दोस्रो जित दर्ता गर्यो।
पहिलो हाफमा उस्मान डेम्बेलेले पाएको पेनाल्टी अवसर गुमाए पनि लुइस एनरिकको टोलीलाई ५०औँ मिनेटमा फाबियन रुइजको गोलले जिततर्फ डोर्यायो।
खेलको सुरुवातीमा अन्जेर्सको कडा रक्षात्मक पंक्तिलाई तोड्न पिएसजीले संघर्ष गर्यो। २५औँ मिनेटमा जोआओ नेभेसलाई बक्सभित्र मारियस कोर्कुलले फाउल गरेपछि पेनाल्टी पाएको थियो। तर बलोन डि’ओरका दाबेदार डेम्बेलेले स्पट-किक गोलपोस्टमाथि प्रहार गर्दा मौका गुम्यो।
दोस्रो हाफ सुरु भएको पाँच मिनेटमै देसिरे डोउको क्रसले अन्जेर्सको डिफेन्समा भ्रम सिर्जना गरेपछि फाबियनले बल नियन्त्रण गर्दै प्रहार गरे र निर्णायक गोल गरे।
८३औँ मिनेटमा नुनो मेन्डेसले अग्रता दोब्बर बनाउने मौका पाए तर उनको तीव्र दौडपछि गरेको कडा प्रहारलाई गोलरक्षक हर्वे कोफीले उत्कृष्ट बचाउ गरे।
खेलको अन्तिमतिर फाबियनले दोस्रो गोलको अवसर पाए पनि उनको प्रहार पोस्टमा लागेर बाहिरियो। सिजनको पहिलो खेलमा पनि पिएसजी विजयी भएको थियो।
