च्यासलले विद्या भण्डारीको सदस्यता खाएको छैन : अध्यक्ष ओली
काठमाडौं । नेकपा एमालेका अध्यक्ष एवं प्रधानमन्त्री केपी शर्मा ओलीले राष्ट्रपति हुने बेला नै विद्या भण्डारीले एमालेको सदस्यता परित्याग गरेको बताएका छन् । दर्ता चलानी फाँटका कर्मचारीलाई झुक्याएर सदस्यता नवीकरण नहुने उनको भनाइ छ ।
पार्टी केन्द्रीय कार्यालयमा आम जनता पार्टीका वरिष्ठ उपाध्यक्ष उपेन्द्र साहलगायतलाई पार्टी प्रवेश गराउन शुक्रबार आयोजित कार्यक्रममा ओलीले विद्याको सदस्यता च्यासलले नखाएको स्पष्ट गरे ।
‘च्यासल ठाउँको नाम हो, यसले कसैको सदस्यता खोसेको छैन, खोज्ने आवश्यकता पनि छैन,’ भण्डारीलाई जवाफ फर्काउँदै ओलीले भने, ‘तपाईंहरूलाई भ्रम नहोस् पूर्वराष्ट्रपतिज्यूले राष्ट्रपति हुने बेलामा नै उहाँले सदस्यता परित्याग गर्नुभएको हो । सदस्यता छाडेर जानुभएको हो । फर्किएका रसिद काट्ने ठाउँमा कर्मचारी झुक्याएर सदस्यता लिने होइन । छाडेको सदस्यता नवीकरण हुँदैन । सदस्यता छैन भने नवीकरण हुन्छ र ?’
हिजो बिहीबार मदन भण्डारी फाउण्डेशनको कार्यक्रममा भण्डारीले एमाले बन्नुभन्दा पहिलेको सदस्यता च्यासलले खोस्न नसक्ने बताएकी थिइन् । तर ओलीले सदस्यता नै छैन भने नवीकरण कसरी हुन्छ ? भनेर प्रतिप्रश्न गरे ।
‘त्यसबेला छाडेर जानुभयो, अहिले नभएको सदस्यता कसरी नवीकरण हुन्छ ? पार्टीमा कुरा गर्नुपर्थ्यो, निवेदन दर्ता गर्नुपर्थ्यो । दर्ता चलानी फाँटबाट नवीकरण गरेँ भन्नुभयो । यो भ्रममा नपर्नु होला,’ ओलीले भने ।
यसअघि नेकपा एमालेको मुख्यालय च्यासल क्षेत्र मनोहरा खोला कोरिडर सडक जलमग्न भएपनि पार्टी मुख्यालयमा आज आयोजना गरिएको पार्टी प्रवेश कार्यक्रममा सहभागी हुन प्रधानमन्त्री केपी शर्मा ओली सोही जलमग्न सडक हुँदै पार्टी कार्यालय प्रवेश गरेका थिए ।
