काठमाडौं। ब्राजिलका स्टार फरवार्ड नेयमारले अन्तर्राष्ट्रिय फुटबलबाट संन्यासको घोषणा गरेका छन्।

फिफा विश्वकप २०२६ को अन्तिम १६ मा नर्वेसँग २–१ को  हारसँगै ब्राजिल प्रतियोगिताबाट बाहिरिएपछि उनले राष्ट्रिय टोलीसँगको १६ वर्ष लामो यात्राको अन्त्य गरेका हुन्।

३४ वर्षीय नेयमारले खेलपछि भावुक हुँदै अब ब्राजिलका लागि आफ्नो यात्रा समाप्त भएको बताए। न्यु जर्सीमा भएको खेलमा इर्लिङ हालान्डले दुई गोल गर्दै नर्वेलाई ऐतिहासिक जित दिलाएका थिए। नेयमारले इन्जुरी समयको पेनाल्टीमार्फत एक गोल फर्काए पनि त्यो ब्राजिलको हार टार्न पर्याप्त भएन। घाइते अवस्थाबाट फर्किए पनि पूरा प्रभाव देखाउन सकेनन् ।

विश्वकपअघि नै चोट बोकेर प्रतियोगितामा पुगेका नेयमारले ब्राजिलका सुरुआती खेल गुमाएका थिए। त्यसपछि उनले प्रशिक्षक कार्लो एन्सेलोटीको योजनाअनुसार बिस्तारै टोलीमा पुनरागमन गरेका थिए।

पूर्ण रूपमा फिट भएपछि पनि उनी अधिकांश समय वैकल्पिक खेलाडीका रूपमा मैदान उत्रिए। उनले स्कटल्यान्ड र नर्वेविरुद्ध बेन्चबाट मैदान प्रवेश गरेका थिए। ब्राजिलका लागि उनको अन्तिम गोल नर्वेविरुद्ध इन्जुरी समयमा पेनाल्टीबाट आयो। तर पाँच पटकको विश्वविजेता टोलीलाई प्रतियोगितामा जोगाउन त्यो पर्याप्त भएन।

सन् २०१० मा सिनियर टोलीबाट डेब्यु गरेका नेयमारले १२९ अन्तर्राष्ट्रिय खेलमा ८० गोल गर्दै ब्राजिलका पुरुष फुटबलतर्फ सर्वाधिक गोलकर्ता बने। चार संस्करणको फिफा विश्वकप खेलेका उनले एक दशकभन्दा बढी समय ब्राजिलको आक्रमणको नेतृत्व गरे। विश्वकप उपाधि जित्ने सपना भने अधुरै रह्यो।

यद्यपि उनले सन् २०१३ मा फिफा कन्फेडेरेसन कप जितेका थिए। त्यसपछि कप्तानका रूपमा सन् २०१६ को रियो ओलम्पिकमा ब्राजिललाई पहिलो पटक स्वर्ण पदक दिलाएका थिए। उनले सन् २०१२ को लन्डन ओलम्पिकमा रजत पदक पनि जितेका थिए।

चोटले बारम्बार रोक्यो यात्रा

नेयमारको अन्तर्राष्ट्रिय करियरमा बारम्बार लागेको चोट सबैभन्दा ठूलो बाधा बन्यो। महत्त्वपूर्ण प्रतियोगिताहरूमा उनी पटक–पटक घाइते भए पनि ब्राजिलका लागि सधैं आशा र भरोसाको केन्द्र बने। उनको उत्कृष्ट प्रदर्शन र सिर्जनात्मक खेलले उनलाई ब्राजिलका सर्वकालीन महान फुटबलरमध्ये एकको रूपमा स्थापित गरायो।

चोटबाट संघर्ष गर्दै विश्वकप टोलीमा स्थान बनाएका नेयमारले पुनः मैदान फर्किन अथक प्रयास गरे। तर अन्तिम १६ मै ब्राजिलको यात्रा टुंगिएपछि उनी मैदानमै भावुक बने। अन्तिम सिटी बज्नेबित्तिकै उनी केहीबेर निश्चल उभिए। त्यसपछि आँसु रोक्न सकेनन् र उनका टोलीका खेलाडीहरूले उनलाई अँगालो हालेर सान्त्वना दिएका थिए।

यस हारसँगै प्रशिक्षक कार्लो एन्सेलोटीको नेतृत्वमा ब्राजिलको विश्वकप यात्रा पनि समाप्त भयो। नेयमारले ब्राजिलका लागि आफ्नो अन्तिम स्पर्श पेनाल्टीमार्फत गोल गर्दै गरे भने अन्तिम खेल आँशुका साथ समाप्त भयो।