विद्यार्थी र कर्मचारीतन्त्रमा दलगत प्रभावले प्रणाली कमजोर
काठमाडौं । प्रधानमन्त्री बालेन्द्र शाहले विद्यार्थी र कर्मचारीतन्त्रमा बढ्दो दलगत प्रभावले प्रणाली कमजोर बनाएको जनाउँदै सरकार गम्भीर रूपमा अघि बढेको बताएका छन्। उनले वर्षौंदेखि पत्रकार, नेता, अभियन्ता तथा सर्वसाधारणले उठाउँदै आएको ‘पार्टीकरणले संस्थागत संरचना बिग्रियो’ भन्ने विषयलाई सम्बोधन गर्न अब ठोस कदम चालिएको दाबी गरेका छन्।
सामाजिक सञ्जालमा लेख्दै उनले ट्रेड युनियन खारेजी दलविरुद्धको लडाई नभएको स्पष्ट पारेका हुन् । प्रधानमन्त्री शाहका अनुसार विगतमा धेरै विद्यार्थी तथा कर्मचारी संगठनहरू पेशागत हितभन्दा दलगत स्वार्थका ‘स्लिपर सेल’ जस्तै बन्न पुगेका थिए। योग्यता र क्षमताभन्दा पहुँच र दलगत निकटतालाई प्राथमिकता दिइँदा प्रणालीप्रतिको जनविश्वास कमजोर बनेको उनले बताएका छन्।
यसै सन्दर्भमा शिक्षालय र कर्मचारीतन्त्रलाई दलगत प्रभावबाट मुक्त गर्ने उद्देश्यले अध्यादेशमार्फत नयाँ व्यवस्था गरिएको प्रधानमन्त्री शाहको भनाइ छ। उक्त व्यवस्थाअनुसार अब शिक्षालयमा दलका झण्डा र कर्मचारीतन्त्रमा दलगत प्रभाव निषेध गरिनेछ।
यसले कसैको अधिकार हनन नगर्ने बरु पेशागत स्वतन्त्रता सुदृढ गर्नेछ। अब नियुक्ति, सरुवा र बढुवामा दलगत निकटता होइन, विधि, क्षमता र दक्षतालाई आधार बनाइने नीति अघि सारिने जनाइएको छ ।
सरकारको भनाइ अनुसार विद्यार्थीले राजनीति सिक्नुपर्ने भए पनि त्यो सभ्य, जिम्मेवार र विचार प्रधान हुनुपर्नेछ। त्यस्तै कर्मचारीले कुनै दलको होइन, जनताको सेवा गर्ने संस्कार विकास गर्नुपर्नेमा जोड दिइएको छ।
यो कुनै विशेष पार्टीविरुद्धको कदम नभई समग्र प्रणाली सुधार र संस्थागत विकासतर्फको प्रयास भएको प्रधानमन्त्री शाहले दाबी गरेका छन्। देशलाई दलगत प्रभावबाट मुक्त गर्दै संस्थागत मार्गमा अघि बढाउने उद्देश्यसहित यो पहल गरिएको उनको प्रष्टोक्ति छ ।
प्रधानमन्त्री शाहले परिवर्तन भाषणले नभई निर्णयबाट आउने उल्लेख गर्दै यस अभियानमा जनताको साथ र विश्वास आवश्यक रहेको जनाएको छ। साथै, आफ्ना सबै निर्णयहरू आम नेपालीको हितमा केन्द्रित रहने प्रतिबद्धता पनि दोहोर्याइएको छ।
‘तपाईंहरूकै चाहनाअनुरूप अध्यादेशमार्फत यी विकृतिहरू हटाएका छौं । हामीलाई सबैको साथ र विश्वासको अपेक्षा छ, तपाईंको साथ चाहिएको छ, विश्वास चाहिएको छ,’ उनले भनेका छन्, ‘किनकि परिवर्तन भाषणले होइन, निर्णयले आउँछ । हामी तपाईंहरूकै जनचाहनाबमोजिम काम गर्न सरकारमा आएका हौं । तपाईंहरू ढुक्क हुनुस्, हामी जे गर्छौं आम नेपाली जनताकै हितमा गर्छौं ।’
