विमानस्थलहरूले हवाई ट्राफिक नियन्त्रकहरूको अभावको सामना गरिरहेका छन् किनभने तिनीहरू या त बिरामी बिदा लिइरहेका छन् वा अन्यत्र काम गरिरहेका छन्। संघीय सरकार सटडाउनका कारण, तिनीहरू तलब बिना काम गर्न बाध्य छन् । संघीय उड्डयन प्रशासन (एफएए) ले देशमा घरेलु उडानहरूमा कटौती चार प्रतिशतबाट शुरू हुने र अर्को हप्ताको अन्त्यसम्ममा १०, १५ वा २० प्रतिशतसम्म बढ्न सक्ने बताएको छ।

न्यूयोर्क, लस एन्जलस, शिकागो, वाशिंगटन डीसीलगायत ४० विमानस्थलमा उडान कटौती हुँदा त्यसको असर यात्रुलाई परेको छ । विगत ३७ दिनदेखिको सटडाउन र तलब नपाएका कर्मचारीका कारण अमेरिकी विमानस्थलमा घरेलु उडान कटौतीको घोषणा गरिएको हो ।

अमेरिकी इतिहासकै सबैभन्दा लामो बन्द निरन्तर रहँदा लाखौं सङ्घीय कर्मचारीले अहिले तलब बिना काम गरिरहेका छन् । जसमा एयर ट्राफिक नियन्त्रकहरू पनि समावेश रहेका बीबीसीले जनाएको छ । यो कटौती बिस्तारै बढ्दै जाने समाचारमा उल्लेख छ । धेरै प्रमुख एयरलाइन्सहरूले अर्को १० दिनभित्र यात्रा गर्ने यात्रुहरूको लागि ब्याकअप टिकट बुक गर्न आग्रह गरेका छन् ।

अक्टोबर १ मा शुरू भएको अमेरिकी सटडाउन ३७ दिनदेखि लागू भएको छ। यो अमेरिकी इतिहासको सबैभन्दा लामो सटडाउन हो । यसअघि, २०१८ मा राष्ट्रपति ट्रम्पको पहिलो कार्यकालमा, सरकारी कामकाज ३५ दिनका लागि रोकिएको थियो । बन्दले ४ करोड २० लाख अमेरिकीहरूको लागि फूड स्ट्याम्प सहायता रोकेको छ।