काठमाडौं ।  नेकपा माओवादी केन्द्रले नेकपा एमालेसँग पार्टी एकताको कुनै चर्चा नभएको स्पष्ट पारेको छ । माओवादीका उपाध्यक्ष तथा प्रवक्ता अग्निप्रसाद सापकोटाद्वारा जारी विज्ञप्तिमा एमालेसँग पार्टी एकता गर्ने नीति वा विचार नरहेको उल्लेख गरिएको छ ।

यसअघि वरिष्ठ उपाध्यक्ष नारायणकाजी श्रेष्ठले पूर्वराष्ट्रपति विद्यादेवी भण्डारीसँग भेट गरी एमालेसँग पार्टी एकताको प्रस्ताव गरेको समाचार सार्वजनिक भएको थियो । तर, माओवादी केन्द्रले उक्त समाचारलाई गम्भीर ध्यानाकर्षणसहित असत्य भएको जानकारी गराएको छ ।

विज्ञप्तिमा भनिएको छ, ‘एमालेबाहेकका अन्य कम्युनिष्ट र समाजवादी मोर्चाका घटकहरूसँग मात्र एकताको बारेमा छलफल भइरहेको छ । तर, एमालेसँग कुनै पनि छलफल वा प्रस्ताव भएको छैन ।’