भारतीय अधिकारीसँग चर्काचर्की
प्रधानमन्त्री मोदीले प्रश्नको जवाफ नदिई हिँडेपछि भारतीय दूतावास र विदेश मन्त्रालयले हेलालाई औपचारिक प्रेस ब्रिफिङमा आउन निम्तो दिएका थिए। सो ब्रिफिङमा हेला र भारतीय विदेश मन्त्रालयका सचिव सीबी जर्जबीच निकैबेर चर्काचर्की भएको थियो।

हेलाका अनुसार उनले भारतमा मानवअधिकारको अवस्था र प्रेस स्वतन्त्रताका विषयमा प्रश्न सोधेकी थिइन्। तर, भारतीय अधिकारीहरूले ती प्रश्नको सिधा जवाफ दिनुको सट्टा भारतले विश्वलाई दिएको योग र कोरोना भ्याक्सिनका बारेमा चर्चा गरेर विषय मोड्न खोजेका थिए।

हेलाले भनिन्, ‘म प्रेस कन्फरेन्समा कुनै देशको तारिफ सुन्न जाँदिनँ। मलाई मेरा प्रश्नको ठोस जवाफ चाहिन्छ, जुन त्यहाँ पाइएन।’

प्रेस स्वतन्त्रतामा आकाश-पातालको फरक
विश्व प्रेस स्वतन्त्रता सूचकांकमा नर्वे विश्वकै पहिलो स्थानमा छ भने भारत पछिल्ला वर्षहरूमा खस्किएर १५७औं स्थानमा पुगेको छ।

नर्वेमा प्रधानमन्त्रीहरू दुर्गम गाउँमा जाँदा समेत त्यहाँका स्थानीय पत्रिकासँग कुरा गर्ने परम्परा रहेको उल्लेख गर्दै हेलाले भारतमा पत्रकारिता चुनौतीपूर्ण र जोखिमपूर्ण रहेको टिप्पणी गरिन्।

उनले थपिन्, ‘भारतमा पत्रकारहरूले निकै सम्हालिएर काम गर्नुपर्ने अवस्था छ। म जबसम्म पत्रकारितामा रहन्छु, नर्वे आउने जुनसुकै राष्ट्रप्रमुखले प्रश्न नलिने प्रवृत्तिको विरोध गरिरहनेछु।’

भारतीय प्रधानमन्त्री मोदीले विदेश भ्रमणका क्रममा बिरलै मात्र प्रेसका प्रश्नहरू लिने गरेका छन्। यसअघि सन् २०२३ मा अमेरिका भ्रमण र २०२५ को फेब्रुअरीमा मात्र उनले सीमित प्रश्नहरूको सामना गरेका थिए।