ओलीले गाडी फर्काएसँगै एमाले अफिस पनि खाली गर्दै
काठमाडौं । ललितपुरको च्यासलस्थित तुल्सीलाल अमात्य स्मृति प्रतिष्ठानमा रहेको पार्टी केन्द्रीय कार्यालय खाली गराउनुपर्ने भएको हो।
भूमि व्यवस्था, सहकारी तथा गरिबी निवारण मन्त्रालयले ‘सरकारी जग्गा दर्ता, उपयोग तथा लिजमा उपलब्ध गराउनेसम्बन्धी कार्यनीति, २०७९ (दोस्रो संशोधनसहित)’ को दफा २१ को उपदफा (२) बमोजिम भोगाधिकार प्राप्त भएको र हालसम्म लिजमा परिणत नगरेको जग्गा तत्काल खाली गर्न निर्देशन दिएको छ।
जारी सूचनामा भनिएको छ, ‘मिति २०७३ जेठ ३१ र मिति २०७४ वैशाख २१ मा तत्कालीन भूमिसुधार तथा व्यवस्थापन विभागबाट प्रकाशित भएको सूचनाको म्यादभित्र लिजमा परिणत गर्न निवेदन नदिएका व्यक्ति, संस्था तथा निकायहरुले भोगाधिकार लिएको जग्गाको भोगाधिकार स्वतः समाप्त भइसकेकोले सम्झौताको शर्तबमोजिम तिर्न बुझाउन बाँकी रकम भए सरकारी कोषमा दाखिला गरी त्यस्तो जग्गा र त्यसमा निर्मित संरचनासमेत तत्काल खाली गर्न भोगाधिकार लिने सम्बन्धित सबैको जानकारीका लागि यो सूचना प्रकाशित गरिएको छ।’
एमालेले तुल्सीलाल अमात्य स्मृति प्रतिष्ठानको नाममा ०५८ चैतमा मन्त्रिपरिषद्बाट स्वीकृत गराएर १२ रोपनी ६ आना पाँच पैसा तीन दाम जग्गा भोगचलन गर्दै आएको छ। तर, उक्त जग्गा लिजमा परिणत नगरिएको पाइएको छ। यसअघि ओलीले राज्यबाट प्राप्त दोहोरो सुविधाको गाडी सरकारलाई बुझाएका छन्। प्रधानमन्त्री तथा मन्त्रिपरिषद् कार्यालयका अनुसार बुधबार ओलीले आफूले प्रयोग गर्दै आएको उक्त सवारी साधन फिर्ता गरेका हुन्।
गृह मन्त्रालयले दोहोरो सुविधा अन्तर्गत लिइएका गाडीहरू फिर्ता गर्न औपचारिक पत्राचार गरेपछि ओलीले बा १३ च ६४३७ नम्बरको निजी प्लेटको गाडी फिर्ता गरेका हुन्। सरकारले पछिल्लो समय पूर्वविशिष्ट पदाधिकारीहरूले कानुन विपरीत वा दोहोरो सुविधाका रूपमा प्रयोग गरिरहेका सरकारी सवारी साधनहरूको यथार्थ विवरण संकलन गरी फिर्ता गराउने प्रक्रिया अघि बढाएको छ।
