रुसी सुरक्षा प्रमुख र चिनियाँ अधिकारीहरूबीच रणनीतिक भेटवार्ता
काठमाडौं । रुसी सुरक्षा प्रमुख र चिनियाँ अधिकारीहरूबीच आइतबार बेइजिङमा भएको भेटवार्ता द्विपक्षीय सम्बन्ध विस्तारको ‘नयाँ आधार’ बन्न सक्ने चीनका उच्च कूटनीतिक अधिकारीले बताएका छन्। बेइजिङ र मस्कोले हालैका वर्षहरूमा आर्थिक सहयोग र कूटनीतिक सम्पर्कलाई तीव्र पारेका छन्, विशेषगरी सन् २०२२ मा रुसले युक्रेनमा आक्रमण गरेपछि उनीहरूको रणनीतिक साझेदारी अझ नजिकिएको छ। चिनियाँ विदेशमन्त्री वाङ यीले रुसी सुरक्षा परिषद्का सचिव सेर्गेइ सोइगुसँगको ‘रणनीतिक संवाद’ का क्रममा यो छलफलले दुई देशको सम्बन्धलाई थप उचाइमा पुर्याउने विश्वास व्यक्त गरे।
वाङले सोइगुलाई भेट्दै विश्वको ‘उथलपुथल’ समयमा बहुपक्षीयतावादलाई कायम राख्न र ‘समान एवं व्यवस्थित बहुध्रुवीय विश्वको वकालत गर्न’ दुवै देशले मिलेर काम गर्नुपर्नेमा जोड दिए। चिनियाँ विदेश मन्त्रालयका अनुसार चीन रुससँग रणनीतिक समन्वयलाई अझ गहिरो बनाउन र नयाँ वर्षमा आपसी सम्बन्धलाई बलियो जगमा उभ्याउन इच्छुक देखिएको छ। बेइजिङमा भएको यो बैठक यस्तो समयमा भएको हो, जब अमेरिकाले युक्रेन द्वन्द्व अन्त्यका लागि मध्यस्थता गर्ने तयारी गरिरहेको चर्चा भइरहेको छ। रुसका उच्च प्रतिनिधिले यसै साता फ्लोरिडामा अमेरिकी अधिकारीहरूसँग पनि भेटवार्ता गरेका थिए।
यद्यपि चीनले आफूलाई युक्रेन युद्धमा एक तटस्थ पक्षका रूपमा प्रस्तुत गर्दै आएको छ र कुनै पनि पक्षलाई घातक सैन्य सहयोग नपठाएको दाबी गर्दछ। तर रुससँगको बढ्दो राजनीतिक र आर्थिक सामीप्यका कारण नेटो सदस्य राष्ट्रहरूले बेइजिङलाई युद्धको ‘निर्णायक प्रोत्साहनकर्ता’ को संज्ञा दिएका छन्। चीनले अहिलेसम्म रुसले युक्रेनमा गरेको आक्रमणको औपचारिक विरोध गरेको छैन। यो भेटवार्ताले विश्व राजनीतिमा चीन र रुसको बढ्दो ध्रुवीकरणलाई अझ प्रस्ट पारेको छ।
