अमेरिकाले अरू देशको आकाशमार्ग बन्द गर्न सक्दैन । अमेरिकी नागरिक उड्डयन प्राधिकरण एफएएले गत हप्ता एयरलाइन्सहरूलाई भेनेजुएलामाथि उड्दा ‘खतरनाक परिस्थिति’ हुनसक्ने चेतावनी दिएको थियो । अमेरिकाका यात्रु तथा कार्गो उडानहरू सन् २०१९ देखि भेनेजुएलामा रोकिएको भए पनि कतिपय अमेरिकी एयरलाइन्स दक्षिण अमेरिकातर्फ उड्दा भेनेजुएलामाथिको आकाशबाट पार गर्छन् ।
ट्रम्पले पछिल्ला हप्ताहरूमा सीआईएलाई भेनेजुएलाभित्र काम गर्न अनुमति दिएको स्वीकार गरिसकेका छन् । उनले मदुरो र उनको सरकारलाई विदेशी आतंकवादी संगठनको सदस्य घोषणा गरेका छन् । यसले भेनेजुएलाभित्र अमेरिकी सैन्य कारबाहीका विकल्पहरू बढाएको छ । बिहीबार ट्रम्पले देशभित्र स्थलमार्गबाट चाँडै आक्रमण हुनसक्ने बताए ।
थ्यांक्सगिभिङको अवसरमा सैनिकहरूसँग कुरा गर्दै उनले भने, ‘तपाईंहरूले धेरै भेनेजुएलाली लागूऔषध तस्करहरूलाई रोक्ने काम गर्दै आउनुभएको छ । समुद्रबाट आउने तस्करहरूको संख्या त धेरै घटिसक्यो । अब छिट्टै जमिनबाट आउने मार्ग पनि रोक्न लागिरहेका छौं ।’
रिपब्लिकन सिनेटर लिन्डसे ग्राहमले ट्रम्पको भनाइको स्वागत गर्दै दक्षिण अमेरिकामा रहेका लागूऔषध प्रोत्साहन गर्ने देशहरूसँग कडा रूपमा जुध्ने ट्रम्पको संकल्पको सम्मान गर्ने बताए । त्यस्ता देशको नेतृत्व भेनेजुएलाले गर्ने उनको भनाइ छ ।
अमेरिकी सेनाले ‘अपरेशन सदर्न स्पीयर’ नामक अभियानअन्तर्गत क्यारिबियाली क्षेत्रमा १२ भन्दा बढी युद्धपोत र १५ हजार सैनिक तैनाथ गरेको छ । डुंगामाथि गरिएको कारबाहीमा दर्जनौं मारिएका छन् । मदुरोले आफ्नो शक्ति देखाउन कोशिश गरिरहेका छन् । उनले सैनिकहरूलाई भने, ‘हामी हातहतियार सहितको गणतन्त्र हौं । देशको रक्षा गर्न तयार रहनुहोस् ।’
ट्रम्पका सहयोगीहरू, विशेषगरी विदेशमन्त्री मार्को रुबियो, अझै पनि मदुरोविरुद्धका सैन्य विकल्पहरूबारे छलफल गरिरहेका छन् । अक्टोबर महिनामा ट्रम्पले भेनेजुएलासँगको कूटनीतिक संवाद बन्द गरेका थिए । तर, गत हप्ता उनले मदुरो कुरा गर्न चाहन्छन् र आफू पनि कुनै समयमा कुरा गर्न खुला रहेको संकेत दिएका थिए । मदुरो र उनका सहकर्मीहरूले ह्वाइट हाउससँग विभिन्न माध्यममार्फत सम्पर्क गरेका छन् । दुवै देशबीच सम्भावित संवादका बारेमा छलफल भइरहेको अमेरिकी अधिकारीहरूले बताए ।
न्युयोर्क टाइम्स र वाल स्ट्रीट जर्नलका अनुसार, ट्रम्प र मदुरोबीच गत हप्ता टेलिफोनमा कुरा पनि भएको थियो । अघिल्लो अनौपचारिक वार्तामा मदुरोले १८ महिनापछि मात्र पदबाट हट्न सक्ने संकेत दिएका थिए । तर, ह्वाइट हाउसले तुरुन्तै राजीनामा मात्र स्वीकार्य हुने बताउँदै त्यो प्रस्ताव अस्वीकार गरेको छ । उता, भेनेजुएलालीहरू यस बढ्दो तनावलाई डर र थकान मिसिएको भावनाका साथ हेरिरहेका छन् ।
गत एक दशकमा भेनेजुएलाले आर्थिक पतन, विशाल विरोधहरू, असफल कूको प्रयास र अनगिन्ती षड्यन्त्रहरू भोगिसकेको छ । राजधानी काराकासमा एक क्याफेकी कामदार म्यारिलिन भन्छिन्, ‘बम हान्ने हुन् कि होइनन् ? कसलाई थाहा छ ? म त समाचार पनि धेरै हेर्दिनँ । वास्तवमा कसैलाई केही थाहा छैन ।’
ट्रम्पका धम्कीहरूले दैनिक जीवनमा प्रत्यक्ष असर नपारे पनि जनतामाथि सरकारी दमन तीव्र छ । प्रुभिया नामक मानवअधिकार समूहका अनुसार, अक्टोबरमै ५४ जना विरोधका कारण पक्राउ परे । कसैलाई त ह्वाट्सयापमा सन्देश पठाएको भरमै पक्राउ गरिएको थियो ।
अमेरिकी आक्रमणको सम्भावनाले भेनेजुएलालीहरूको मनमा भय उत्पन्न गराएको छ । तर, यस्तो कुरा सार्वजनिक रूपमा कोही बोल्दैन । बाहिर भने जीवन सामान्य चलिरहेको छ क्रिसमस गीत, ब्ल्याक फ्राइडेका विज्ञापन र टेलिभिजनमा मदुरोका दैनिक भाषणहरू सुनिइने गरेको छ । सोमबार मदुरोले भने, ‘अमेरिकाले जे गरे पनि भेनेजुएलालाई जित्न सक्दैन । हाम्रो देश अजेय छ ।’
