काठमाडौं । अरनिको राजमार्गको महत्त्वपूर्ण खण्ड मानिने सूर्यविनायकदेखि काभ्रेपलाञ्चोकको धुलिखेलसम्मको सडक विस्तार आयोजनाले ५० प्रतिशत भौतिक प्रगति हासिल गरेको छ । सडक सीमा विवाद र बजेट अभावका बीच सुस्त बनेको आयोजनाले पछिल्लो समय गति लिएको हो ।

ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकासमन्त्री कुलमान घिसिङले शनिबार आयोजनाको स्थलगत अनुगमन गर्दै आगामी असार मसान्तभित्र निर्माण सम्पन्न गर्न कडा निर्देशन दिएका छन् । कुल १५.८ किलोमिटर लामो यो सडकलाई ६ लेनमा विस्तार गर्न दुईवटा प्याकेज बनाएर काम भइरहेको छ । आयोजनाका अनुसार सूर्यविनायकदेखि साँगासम्मको ८.३ किलोमिटर खण्डमा ४५ प्रतिशत काम सकिएको छ । यस्तै, साँगादेखि धुलिखेलसम्मको ७.५ किलोमिटर खण्डमा भने ५५ प्रतिशत प्रगति हासिल भएको छ ।

सडक विस्तारको मुख्य चुनौती मानिने टेवा पर्खाल र नाली निर्माणको काम ९५ प्रतिशत सम्पन्न भइसकेको छ भने साँगा-धुलिखेल खण्डको करिब २ किलोमिटर सडक कालोपत्रे समेत भइसकेको छ ।