काठमाडौं ।  अस्ति बुधबारदेखि अशान्त बनेको बाराको सिमरा हिजो बेलुकादेखि सामान्य अवस्थामा फर्कन थालेको छ । एमाले कार्यकर्ता र जेनजी युवाहरुबीच झडप भएपछि अस्ति र हिजो दिनभरजसो सिमराको अवस्था तनावग्रस्त थियो । एमाले कार्यकर्ताले आफूहरूमाथि कुटपिट गरेको भन्दै जेनजी युवाहरूले हिजो पनि कर्फ्युकाबीच प्रदर्शन गरे ।

हिजो दिउँसो प्रहरी र जेनजी प्रदर्शनकारीबीच झडपसमेत भएको थियो । जिल्ला प्रशासन कार्यालय बाराका अनुसार हिजो बेलुकादेखि पथलैया– वीरगन्ज सडकखण्डमा गाडीहरू गुड्न थालेका छन् । जेनजी प्रदर्शनकारीहरूले सडक खाली गरेपछि गाडीहरू गुड्न थालेका हुन् । सिमरामा हिजो पनि बेलुकी ८ बजेसम्म कर्फ्यु लगाइएको थियो ।