काठमाडौं ।  सरकारले नेपाल प्रहरीको ३२औँ महानिरीक्षक (आईजीपी) मा अतिरिक्त महानिरीक्षक (एआईजी) चन्द्रकुवेर खापुङलाई नियुक्त गरेको छ । प्रधानमन्त्री केपी शर्मा ओलीको अध्यक्षतामा बालुवाटारमा शुक्रबार बसेको मन्त्रिपरिषद् बैठकले खापुङलाई आईजीपीमा नियुक्त गर्ने निर्णय गरेको हो ।

हाल प्रहरी महानिरीक्षक दीपक थापा भदौ १८ गते राति अनिवार्य अवकाशमा जान लागेका छन् । प्रधानमन्त्री ओली शनिबार चीन भ्रमणमा प्रस्थान गर्ने र १८ गते मात्रै फर्किने भएकाले त्यसअघि नै सरकारले नयाँ आईजीपीको टुंगो लगाइएको हो ।

एआईजी खापुङ हाल प्रहरीको केन्द्रीय अनुसन्धान ब्युरो (सीआईबी) प्रमुख रहेका छन् । यसअघि उनी डीआईजीका रूपमा पनि सीआईबीमै कार्यरत थिए भने एआईजी भएपछि पनि त्यहीँ जिम्मेवारी सम्हालेका थिए । त्यसअघि उनले कोशी प्रदेश प्रहरी प्रमुखको भूमिका निर्वाह गरेका थिए ।