काठमाडौं ।  प्रधानमन्त्री केपी शर्मा ओलीले आज प्रतिनिधि सभाको बैठकमा विशेष सम्बोधन गर्ने भएका छन् । शनिबारदेखि सुरु हुने चीन भ्रमणको पूर्वसन्ध्यामा प्रधानमन्त्री ओलीले संसदलाई आफ्नो भ्रमणबारे जानकारी गराउने कार्यक्रम रहेको छ ।

प्रधानमन्त्रीको सम्बोधनमा चीन भ्रमणका मुख्य एजेन्डाहरू, नेपाल-चीन सम्बन्धका आयामहरू र भ्रमणको अपेक्षित परिणामबारे विस्तृत जानकारी दिने अपेक्षा गरिएको छ । चीन भ्रमणबाट फर्किएलगत्तै भारत भ्रमणमा जाने तयारीमा रहेकाले सोबारे पनि प्रधानमन्त्रीले संसदलाई अवगत गराउने अनुमान गरिएको छ ।

हालैका दिनमा चर्चामा रहेको सीमा विवाद र देशको पछिल्लो राजनीतिक अवस्थालाई पनि प्रधानमन्त्रीले आफ्नो सम्बोधनमा समेट्ने स्रोतले जनाएको छ । बिहीबार सिंहदरबारमा प्रमुख सचेतकहरूसँगको छलफलका क्रममा सभामुख देवराज घिमिरेले प्रधानमन्त्रीको सम्बोधनबारे जानकारी गराएका थिए ।