काठमाडौं । नेकपा एकीकृत समाजवादीका वरिष्ठ नेता झलनाथ खनाल र वामदेव गौतमबीच डल्लुमा भेटवार्ता भएको छ। हालै पार्टीमा प्रवेश गरेका वामदेवले झलनाथलाई भेट्न उनका निवास पुगेका थिए।

यो भेट पार्टी अध्यक्ष माधव नेपाल र झलनाथ खनालबीच चर्किएको विवादको बेला भएकोले राजनीतिक रुपमा महत्वपूर्ण मानिएको छ। झलनाथको सचिवालयले भने भेट सामान्य छलफल र समसामयिक विषयमा सीमित भएको जनाएको छ।

माधव र झलनाथबीचको विवादले पार्टीभित्र असन्तुष्टि फैलिएको छ र यसले स्थायी कमिटी, पोलिटब्युरो र केन्द्रीय कमिटी बैठक बोलाउनुपर्ने अवस्था सिर्जना गरेको छ। विवाद यति बढेको छ कि दुबै पक्षले पार्टी छाड्ने प्रस्ताव समेत राखेका छन्।

यो भेटपछि पार्टीभित्रको तनाव कम हुने कि झन बढ्ने, आगामी दिनले देखाउनेछ।