काठमाडौं ।  बाजुरामा चट्याङ लागेर ३९ भेंडाबाख्रा मरेका छन् भने ४९ बेपत्ता भएका छन्। गत बिहीबार जिल्लाको स्वामिकार्तिक खापर गाउँपालिका–१ का सज्जन कडाराका ११ र जसबिर रावलका २८ गरी ३९ वटा भेंडाबाख्रा मरेको जिल्ला प्रहरी कार्यालय बाजुराले जनाएको छ।

जिल्ला प्रहरी कार्यालय बाजुराका सूचना अधिकारी नरेशबहादुर शाहीका अनुसार बिहीबार दिउँसो रानीसैन वन क्षेत्रमा पानी परिरहेको बेला ओडारमा ओत लागेका भेंडाबाख्रामाथि एक्कासी चट्याङ पर्दा उक्त क्षति भएको हो। उहाँले भन्नुभयो, “चट्याङका कारण सज्जन कडाराका २५ र जसबिर रावलका २४ भेंडाबाख्रा बेपत्ता भएका छन्।”

वैशाख महिनामा परेको अविरल वर्षासँगै आएको चट्याङ र पहिरोका कारण मानवीय क्षति नभए पनि पशुचौपायामा ठुलो क्षति भएको सूचना अधिकारी शाहीले बताउनुभयो। यसैबीच, वैशाख १५ गते आएको वर्षाका कारण जगन्नाथ गाउँपालिका–२ माथिल्लो हुनीका चैनबहादुर विष्टका ५४ मध्ये दुई भेंडाबाख्रा मरेका र नौ बेपत्ता भएका छन्। सोही गाउँका अमृत ल्वारका ५६ मध्ये तीन मरेका र १४ बेपत्ता भएका छन्।

त्यस्तै, राजबहादुर विष्टका ४० मध्ये पाँच मरेका र १० अझै बेपत्ता छन् भने ऐनबहादुर विष्टका ९५ मध्ये तीन मरेका र पाँच बेपत्ता रहेको प्रहरीले जनाएको छ। यसअघि पनि १६ भेंडाबाख्रा मरेका र ३८ बेपत्ता भएका थिए।