बेन्जामिन नेतान्याहूले सामाजिक सञ्जाल प्लेटफर्म X मा एक भिडियो वक्तव्य जारी गरे। उनले भने, “अली लारिजानी रिभोलुसनरी गार्ड्सका प्रमुख थिए, जुन वास्तवमा इरान चलाउने गिरोह हो। हामीले बासिजका कमाण्डरलाई पनि हटायौं। यी तिनै मानिसहरू हुन् जसले तेहरान र अन्य शहरहरूमा मानिसहरूलाई आतंकित गर्छन्।”

उनले थप भने, “हामी यो शासनलाई कमजोर बनाउँदैछौं ताकि इरानका जनताले यसलाई हटाउने अवसर पाऊन्। यो तुरुन्तै हुनेछैन, न त यो सजिलो हुनेछ। तर यदि हामी दृढ रह्यौं भने, उनीहरूले आफ्नो भविष्य आफैं निर्धारण गर्ने अवसर पाउनेछन्।”

नेतान्याहूले भने, “हामी खाडीमा रहेका हाम्रा अमेरिकी साथीहरूलाई सहयोग गरिरहेका छौं। मैले हिजो राष्ट्रपति ट्रम्पसँग यसबारे लामो कुरा गरें। म, राष्ट्रपति ट्रम्प र उनको टोली बीच समन्वय छ। हामी अप्रत्यक्ष आक्रमणहरू मार्फत इरानी शासनलाई दबाब दिनेछौं र प्रत्यक्ष कारबाही पनि गर्नेछौं। अझै धेरै आश्चर्यहरू छन्।”

“म तपाईंलाई निराशा फैलाउने माध्यमहरूलाई बेवास्ता गर्न आग्रह गर्दछु। हामी ऐतिहासिक उपलब्धिहरू हासिल गर्दैछौं। अक्टोबर ७ पछि, हामी गहिरो समस्यामा थियौं, तर अब हामी एक शक्तिशाली शक्ति बनेका छौं। हामीसँग काँधमा काँध मिलाएर लडिरहेको एक विश्वव्यापी महाशक्ति मित्र छ।”  बेन्जामिन नेतान्याहूभन्दा पहिले इजरायली रक्षामन्त्री इजरायल काट्जले अली लारिजानीको मृत्यु भएको दाबी गरेका थिए। इजरायली रक्षा बलले पनि यही कुरा बताएको थियो। यद्यपि, इरानले यसको पुष्टि गरेको छैन। यदि यो समाचारको पुष्टि भयो भने खामेनाइपछि इरानलाई लारिजानेको मृत्यु ठूलो क्षतिको रूपमा लिइने छ ।