‘खोला छेउमा बसेका उहाँहरूको सुरक्षाको लागि त्यो कदम चालिएको हो। बाढी आउँदा उहाँहरू बसेको बस्ती डुबानमा पर्छ, ज्यान जोखिममा हुन्छ,’ स्थानीय मतदातासँगको अन्तरक्रियामा बालेनले भने, ‘हरेक वर्ष बर्खामा बाढी आउँदा उहाँहरूलाई निकालेर सुरक्षित स्थानमा सार्नुपर्छ। काठमाडौंमा हामीले गर्न खोजेको उहाँहरूलाई जोखिमबाट निकालेर सुरक्षित ठाउँमा राख्नु थियो। तर, बालेनले डोजर चलायो भनेर गलत भाष्य निर्माण गरियो। खासमा त्यो मान्छेको ज्यान जोगाउन गरिएको प्रयास थियो।’

बालेनले सुकुम्बासी समस्या समाधानका लागि विभिन्न समयमा बनेका भूमि आयोगहरूले वास्तविक सुकुम्बासीले भन्दा पार्टीका कार्यकर्ताले मात्र फाइदा लिएको आरोप लगाए।

‘२०४८ सालदेखि २३ वटा आयोग बने, तर समस्या जस्ताको तस्तै छ। आयोगमा पार्टीका मान्छे भर्ती गर्ने र उनीहरूले आफ्नै नजिकका मान्छेलाई लालपुर्जा बाँड्ने काम मात्र भयो,’ बालेनले भने, ‘यसले गर्दा जसको पहुँच छ, उसले लालपुर्जा माथि लालपुर्जा थप्यो, तर वास्तविक सुकुम्बासी सधैं पीडामा रहे। यो सिस्टम सुधार गर्नुपर्छ।’

उनले आफूले सुकुम्बासीलाई विस्थापन गर्न नभई उनीहरूको उचित व्यवस्थापन गर्न खोजेको दाबी गर्दै विपक्षीहरूले भोट बैंकको राजनीति गर्न आफ्नो अभियानलाई बदनाम गराएको बताए।

२०७९ को निर्वाचनमा भारी मतान्तरले विजयी भएका एमाले अध्यक्ष केपी शर्मा ओलीसँग बालेनको प्रतिस्पर्धालाई यसपटकको निर्वाचनको सबैभन्दा रोचक भिडन्तका रूपमा हेरिएको छ। काठमाडौं महानगरको नेतृत्व गरिसकेका बालेनले झापा पुगेर ओलीसँगै आमने-सामने हुने आँट गरेपछि झापा-५ को चुनावी माहोल तातिएको छ।