काठमाडौं । बाँकेको नौवस्तास्थित बाल सुधार गृहमा गएराति भएको झडपमा परी पाँच जनाको मृत्यु भएको छ भने अन्य दुई जना गम्भीर घाइते भएका छन् ।

झडपमा परी दैलेखका भूपेन्द्र खत्री, बाँकेका समीर थापा, अछामका उमेश विष्ट, कैलालीका जगत देउवा र दाङका दिनेश घर्तीमगरले ज्यान गुमाएका छन् । घाइते दुई जनाको नेपालगन्जस्थित भेरी अस्पतालमा उपचार भइरहेको छ । उनीहरूको अवस्थाबारे विस्तृत जानकारी आउन बाँकी छ ।

घटनाको जानकारी पाउनासाथ सुरक्षाकर्मीको टोली घटनास्थल पुगेको थियो । झडपको कारणबारे अनुसन्धान भइरहेको जिल्ला प्रहरी कार्यालय, बाँकेले जनाएको छ । प्रारम्भिक रिपोर्ट अनुसार, सुधार गृहभित्र रहेका युवाहरूबीच कुनै विषयलाई लिएर विवाद बढेपछि झडपले हिंसात्मक रूप लिएको बुझिएको छ ।