काठमाडौं । राष्ट्रियसभाले निजामती सेवा विधेयकको कुलिङ पिरियडबारे त्रुटि सच्याएको छ। राष्ट्रियसभाअन्तर्गतको विधायन व्यवस्थापन समितिको शनिबार बसेको बैठकले दुई बर्षे कुलिङ पिरियड राख्ने विषयमा सहमति जुटाएको हो।

यसअघि प्रतिनिधिसभाको राज्य व्यवस्था तथा सुशासन समितिले पनि दुई वर्षे कुलिङ पिरियडमा सहमति जुटाएर प्रतिवेदन प्रतिनिधिसभामा पठाएको थियो। तर त्यसमा यसअघिकै व्यवस्था पनि कायम भएकाले कुलिङ पिरियडको दुई वर्षे अवधि निष्प्रभावी भएको थियो।

प्रतिनिधिसभाले समितिकै प्रतिवेदनलाई पारित गरेर राष्ट्रियसभामा पठाएको थियो। जसमा दुई बर्षे कुलिङ अवधिको दफा नै गायब भएको थियो । जसको कारण समिति र सरकारबिच आरोप–प्रयारोप चलेर छानविन समिति गठन भई समितिका सभापति रामहरि खतिवडाले नैतिक जिम्मेवारी लिएर सभापति पदबाट राजीनामासमेत गरेका थिए । राष्ट्रियसभाको विधायन समितिले त्यसलाई सच्याउँदै दुई वर्षे कुलिङ पिरियड कायम हुने व्यवस्था गरेको छलफलमा रहेकी सामान्य प्रशासन मन्त्री भगवती न्यौपानेले जानकारी दिइन्।

ु“सबै सांसदहरूले उठाउनु भएको कुलिङ पिरियड राखेर जाउँ। कसैलाई यसबाट अन्याय भयो भने हामी पछि अरु कानुनमा विचार गरौंला। राष्ट्रियसभामा कतिले के होला कसो होला भन्नु भएको छ। राष्ट्रियसभाले जहिले सहमतिमा हुन्छ। सरकार रिजिड (कठोर) छैन सकारात्मक सोचका साथ अगाडि बढौं भन्ने सहमति भएको छ”, मन्त्री न्यौपानेले भनिन्। समितिले सच्याएको विधेयक अब राष्ट्रियसभाले पारित गरी पुनः प्रतिनिधिसभा पठाउने छ।