एमाले कसैको आतंकबाट नडराउने पार्टी हो : अध्यक्ष ओली
काठमाडौं । नेकपा एमालेका अध्यक्ष केपी शर्मा ओलीले आफ्नो पार्टी मूल ढोकाबाटै सिंहदरबार प्रवेश गर्ने र देशमा समृद्धि ल्याएरै छाड्ने दाबी गरेका छन्। ओलीले एमालेको राजनीतिक यात्रालाई कमजोर नआँक्न चेतावनी दिँदै पार्टीले आगामी दिनमा मुलुकको नेतृत्व गर्दै विकास र समृद्धिको लक्ष्य पूरा गर्ने बताएका हुन्।
पार्टीको राष्ट्रिय भेलामा सम्बोधन गर्दै उनले भने, ‘हेक्का रहोस्, एमाले मूल ढोकाबाट सिंहदरबार पस्छ र समृद्धि ल्याएरै छोड्छ ।’ ओलीले सरकारले आफू, नेपाली कांग्रेसका निवर्तमान सभापति शेरबहादुर देउवा र नेपाली कम्युनिष्ट पाटीका संयोजक पुष्पकमल दाहाललाई पक्राउ गर्ने धम्की दिएको बताए ।
राणाशासन, पञ्चायती व्यवस्था र निरंकुश राजतन्त्रविरुद्ध संघर्ष गरेर आएको राजनीतिक नेतृत्वलाई सामान्य रूपमा नलिन उनले चेतावनी समेत दिए। उनले कसैविरुद्ध अपराधको प्रमाण भेटिए कानूनी कारबाही गर्न आग्रह गरे। तर, पक्राउ गर्ने धम्की नदिन चेतावनी दिए। अध्यक्ष ओलीले गृहमन्त्री सुदन गुरुङले फाइल खोल्ने र १०१ जनालाई पक्राउ गर्ने अभिव्यक्ति दिएको प्रसंग उल्लेख गर्दै सके सबैलाई थुन्न चुनौती दिए।
ओलीले अगाडि भने, ‘हामी राणाशासनका विरुद्ध लडेर आएका हौँ, पञ्चायती शासनका विरुद्ध लडेर आएका हौँ, निरङ्कुश राजतन्त्रका विरुद्ध लडेर आएका हौँ। अनि ६ महिनेको जागिर खाने एउटा सिपाहीले भन्छ फलनालाई थुन्दिन्छु, ठट्टा मजाक ग-या हो? तिनी जन्मिनभन्दा अगाडिदेखि हामी देशका लागि आन्दोलनमा ज्यानको बाजी थापेर हिँडिराखेका छौँ। मजाक गर्ने हामीमाथि? थुने हुन्छन् त समातेर। जो आउँछ थुन्दिन्छु, जो आउँछ थुन्दिन्छु, के हो यो? हामी मजाकका पात्र हौँ? ठट्टा जस्तो भएको छ सबलाई।’
उनले थपे, ‘प्रमाण भेटे त उनी पनि थुनिन्छन् होला नि, गलत काम ग-या प्रमाण भेटे। अरू पनि त थुनिन्छन् होला नि। गृहमन्त्रीको देखिन्छ, फाइल खोल्दै छु, पर्खिनुस् सब थुनिन्छन्, १०१ थुनिन्छन्। कसलाई भन्या हो? अब सबै थुनिन्छन् भने उनी र को बाँच्छन् त नेपालमा?’ उनले एमाले कसैको आतंकबाट नडराउने पार्टी नभएको बताए। गृहमन्त्री विरुद्ध पनि विभिन्न प्रमाणहरू रहेको ओलीले उल्लेख गरे।
