भोलि धर्ना, सोमबार अस्पतालमा आकस्मिकबाहेक सेवा ठप्प
काठमाडौं । नेपाल चिकित्सक महासंघले सोमबार देशभरका अस्पताल तथा स्वास्थ्य संस्थामा आकस्मिक बाहेकका सम्पूर्ण सेवा बन्द गर्ने घोषणा गरेका छन्। संघले उपभोक्ता अदालतसम्बन्धी विषयमा असन्तुष्टि जनाउँदै विभिन्न आन्दोलनका कार्यक्रम घोषणा गर्दै यस्तो निर्णय गरेको हो।
संघले मिति २०८२ असार १९ गते बिहीबार विभिन्न अस्पताल प्रमुख, मेडिकल र डेन्टल कलेज, चिकित्सक तथा स्वास्थ्यकर्मी संघ संगठनसँगको छलफलपछि शुक्रबार आकस्मिक बसेको थियो।
नेपाल चिकित्सक संघ कार्यकारिणी समितिको आकस्मिक बैठकले हालको विषम परिस्थितिमा चिकित्सलाई हतोत्साहित पार्ने र असुरक्षित वातवरण सिर्जना गर्ने कार्य भएको निष्कर्ष निकाल्दै यस्तो निर्णय गरेको संघका महासचिव डा. सञ्जीव तिवारीले जानकारी दिए।
संघले आइतबार सम्पूर्ण चिकित्सकले आफ्नो-आफ्नो कार्यस्थलमा पहिलो एक घण्टा धर्ना दिने निर्णय गरेको छ। त्यससैगरी, सम्पूर्ण शाखा कार्यालयलाई चिकित्सकको हस्ताक्षर र नेपाली मेडिकल काउन्सिलको प्रमाणपत्र संकलन गरि सोमबारभित्र केन्द्रीय कार्यक्रमा बुझाउन संघले आग्रह गरेको छ। संघले मङ्गलबार सम्पूर्ण चिकित्सकको प्रमाणपत्र काउन्सिलमा बुझाउने कार्यक्रम तय गरेको छ ।
संघले घोषणा गरेको आन्दोलनको एसोसिएसन अफ प्राइभेट मेडिकल एण्ड डेन्टल कलेज, अफिन, एपोन, केमसन, नेपाल नर्सिङ एसोसिएसन, नेपाल फिजियोथेरापी एसोसिएसन, नेपाल भेटेरिनरी एसोसिएसन, एनाभीएमआईए, एनपीएचओले ऐक्यबद्धता जनाएका छन्।
