नेप्से सूचक ११५ अंक माथि उक्लियो
काठमाडौं । साताको पहिलो दिन आइतबारदेखि हरियाली छाएको शेयर बजार विहीबारसम्म लगातार ५ दिन बढेको छ । शेयर बजारमा साताभर हरियाली छाउँदा नेप्से सूचक ११५ अंक माथि उक्लिएको छ ।
नेपाल राष्ट्र बैंकले चालु आवको मौद्रिक नीतिको पहिलो त्रैमासिक समिक्षा सार्वजनिक गर्ने तयारी गर्दै गर्दा शेयर लगानीकर्ताहरु राष्ट्र बैंक शेयर बजारप्रति थप उदार हुनेमा आशावादी देखिएका छन् । जसले गर्दा पछिल्लो दिनहरुमा बजारमा सुधार आएको छ भने कारोबारमा उत्साह थपिएको छ ।
नेपाल राष्ट्र बैंकले चालु आर्थिक वर्षको मौद्रिक नीतिको पहिलो त्रैमासिक समीक्षा सार्वजनिक गर्ने तयारी गरिरहदा शेयर बजारमा भने एकाएक उत्साह देखिएको छ । राष्ट्र बैंकले शेयर बजारमा लगानी बढाउने थप व्यवस्थाहरु गर्न लागेको चर्चा चलेपछि यसको प्रभाव शेयर कारोबारमा देखिएको हो।
पछिल्लो ५ कारोबारमा दिनमा नेप्से ११५.७२ अंक बढीले उकालो लागेको छ । आइतबार ३३.९२ अंके बढेको नेप्से सोमबार ५०.४४, मंगलबार ५.३२, बुधबार ९.६१ तथा बिहीबार १०.४३ अंकले बढेको छ । योसँगै नेप्से २६७३.०३ विन्दु माथि उक्लिएको छ ।
नेपाल राष्ट्र बैंकले मौद्रिक नीति समीक्षाको तयारी गर्दैछ । आर्थिक वर्षको प्रत्येक त्रैमासिक सकिएको ४५ दिनभित्र मौद्रिक नीतिको समीक्षा गर्ने व्यवस्था अनुसार राष्ट्र बैंकले नीतिको समीक्षा गर्न लागेको हो । यहि मंसिर १५ गतेसम्म मौद्रिक समीक्षा सार्वजनिक गर्नुपर्नेछ ।
