काठमाडौं । सरकार र आन्दोलनरत शिक्षक महासंघका प्रतिनिधिहरुबीच हिजो भएको चरणबद्ध वार्ता सकारात्मक रूपमा अघि बढेको बताइएको छ। हिजो मंगलबार राति शिक्षा, विज्ञान तथा प्रविधिमन्त्री रघुजी पन्त र शिक्षक महासङ्घसँगबीच भएको वार्ता सकारात्मक दिशामा अघि बढेको मन्त्री पन्तले जानकारी दिए।

शिक्षकसँगको वार्ता सम्भव भएसम्म छिटो टुङ्गो लगाउन लागिएको पनि उनले सञ्चारकर्मीलाई बताए । शिक्षामन्त्री पन्त र महासङ्घका पदाधिकारीबीचको वार्ता हिजो राति ८ बजेदेखि साढे १० बजेसम्म चलेको थियो । वार्तामा उपप्रधान एवं अर्थमन्त्री विष्णुप्रसाद पौडेल र गृहमन्त्री रमेश लेखक पनि सहभागी थिए ।
साथै महासङ्घका तर्फबाट अध्यक्ष लक्ष्मीकिशोर सुवेदी नेतृत्वमा शिक्षकहरूको टोली वार्तामा सहभागी भएको थियो।

सरकार र आन्दोलनरत शिक्षक महासङ्घबीच आज पुनः वार्ता हुनेछ । शिक्षक सङ्घ सङ्गठनहरूले विभिन्न माग राखी गत चैत २० गतेदेखि आन्दोलन गरिरहेका छन् । जसका कारण देशभरका सामुदायिक विद्यालयमा शैक्षिक सत्र २०८२ को सुरुदेखि नै पठनपाठन प्रभावित भएको छ ।