आजदेखि लागु हुने गरी अण्डाको मूल्यवृद्धि
काठमाडौं । आजदेखि लागु हुने गरी नेपाली अण्डाले किसानको लागत उठ्ने गरी नयाँ मूल्य पाएको छ । शुक्रबार बसेको नेपाल लेयर्स कुखुरापालक सङ्घको बैठकले नेपाली अण्डा उत्पादन तथा बजारीकरणबारे छलफल गर्दै आज शनिबार देखि लागु हुने गरी न्यूनतम समर्थन मूल्य निर्धारण गरेको सङ्घका अध्यक्ष विनोद पोखरेलले जानकारी दिए । किसानको फार्म लागतलाई आधार मानेर जारी गरिएको मूल्यसूची अनुसार यसको मूल्यमा उल्लेखनीय वृद्धि भएको छ । नयाँ दरअनुसार अति ठुलो (एक्स एल) अण्डा प्रतिक्रेट (३० वटा) ५६०, ठुलो अण्डा ५४५, मिडियम अण्डा ५३० रहेको छ ।
अध्यक्ष पोखरेलका अनुसार अघिल्लो मूल्यभन्दा प्रतिक्रेट रुपैयाँ ४० ले वृद्धि भएको हो । भारतमा निर्वाचनका कारण सिमानामा कडाइ बढ्दा त्यहाँको अण्डा महँगो भएको र अवैध रूपमा नेपाल आउने मार्ग बन्द भएपछि नेपाली अण्डाले उचित मूल्य पाएको बताए । उनका अनुसार जाडो महिनामा अण्डाको खपत स्वाभाविक रूपमा बढ्ने गर्छ । पोखरेलले भने,, “चिसोमा अण्डा खानुपर्छ भन्ने जनचेतना बढेकाले माग पनि बढेको छ ।” गत साउनमा पनि रुपैयाँ ५६० नै मूल्य पुगेको अण्डा त्यसपछि क्रमशः घट्दै गएको थियो । हाल फेरि क्रमशः वृद्धि हुँदै किसानले लागत उठाउन सक्ने अवस्थामा पुगेको सङ्घले जनाएको छ ।
