काठमाडौं ।  नेपाली वा विदेशी नागरिकले नगद विदेशी मुद्रा अमेरिकी डलर ५ हजारसम्म भन्सार घोषणा विना नेपालमा ल्याउन पाउने भएका छन् । नेपाल राष्ट्र बैंकले विदेशी विनिमय ऐन–२०१९ को दफा ५ र दफा १२ का व्यवस्थाहरु, सम्पत्ती शुद्धिकरण निवारण ऐन–२०६४ को दफा २९ (क) को व्यवस्थाले उक्त घोषणा गरेको हो ।

अमेरिकी डलर ५ हजार भन्दा बढी नेपाल भित्र ल्याउने हकमा भने भन्सार घोषणा गरी प्रमाणित गराउनु पर्ने हुन्छ । भारतीय रुपैयाँको हकमा अमेरिकी डलर ५ हजार बराबर हुन आउने भारतीय रुपैयाँसम्म र राष्ट्र बैंकबाट विनिमय दर प्रकाशन नहुने अन्य विदेशी मुद्राको हकमा समेत अमेरिकी डलर ५ हजारसम्म नेपाल भित्र ल्याउन पाउने छ ।

सन् २०१६ नोभेम्बर ९ भन्दा अगाडि चलनचल्तीमा रहेका भारतीय रुपैयाँ ५ सय र एक हजार दरका नोटको कारोबार गर्न तथा भारतीय रुपैयाँ २ सय, ५ सय र २ हजार दरका नोट साथमा राख्न, ओसार–पसार गर्न र कारोबार गर्न नपाइने व्यवस्था थियो । नेपाली नागरिकले भारत बाहेक अन्य मुलुकमा भारतीय रुपैयाँ लेजान र वा अन्य मुलुकबाट भारतीय रुपैयाँ नेपाल ल्याउन नपाउने व्यवस्था थियो ।