काठमाडौं । बनेपामा चण्डेश्वरी जात्रा आज शुक्रबारदेखि सुरु भएको छ । हरेक वर्ष चण्डि पूर्णिमा अवसरमा उक्त मनाइने गरिन्छ । करिब ६ सय वर्ष पहिले राजा आनन्द देवको पालामा चण्डेश्वरी जात्रा सुरु भएको थियो। परापूर्वकालमा चण्डासूर नामक दैत्यले तेत्तीसकोटी देवताका साथै बनेपा नगरवासीहरुलाई धेरै दुःख दिएकाले मुक्तिका लागि चण्डेश्वरी माई रक्त चन्दनको वनमा प्रकट भई दैत्यको नाश गरेको खुसियालीमा बनेपा नगरवासीहरुले हरेक वर्ष चण्डेश्वरी माई जात्रा मनाउने गर्दछन् ।

जात्राको पहिलो दिन बिहीबार तकः पूजा अर्थात् चण्डेश्वरीसहित विभिन्न देवीदेवताको पूजा गरी चण्डेश्वरीमा १२ वटा काला बोकाको बलि दिइएको थियो । जात्राको दोस्रो दिन बिहान अर्थात् पूर्णिमाको दिन (शुक्रबार) बिहान ३ :३० बजे स्थानीयहरुले चिराग लिएर बनेपाको लायकु दरबारमा उपस्थित भई विभिन्न बाजागाजासहित भजन कीर्तन गर्दै चण्डेश्वरी नजिकै रहेको जैसिगाकुण्ड, पवित्र तीर्थस्थलमा गई नुहाएका थिए ।

जात्राको दोस्रो दिमै काठमाडौंको हनुमानढोकाबाट कानफुट्टा जोगी आएपछि बनेपाको तीन धारामा एक भेँडा र एक कुखुराको भाले काटेर पूजाआजा गरी देवता राख्न रथलाई चण्डेश्वरी मन्दिरतर्फ लैजाने प्रचलन छ ।