वर्षाका कारण काठमाडौैं उपत्यकाका विभिन्न क्षेत्र डुबानमा (फोटो फिचर)

काठमाडौैं । अविरल वर्षाका कारण काठमाडौैं उपत्यकाका विभिन्न क्षेत्रमा डुबान भएको छ । गए रातिदेखि परेको अविरल वर्षाका कारण उपत्यकाका विभिन्न क्षेत्रमा डुबान हुनुका साथै जलमग्न भएको प्रहरीले जनाएको छ ।
भारी वर्षाका कारण काठमाडौँ उपत्यकाका ढुङ्गेधारा क्षेत्र, गौरीघाट, गुह्येश्वरी, कपन, सामाखुसी, अनामनगर, भक्तपुरको हनुमन्ते खोला वरिपरिलगायतका क्षेत्र डुबानमा परेको छ । भारी वर्षाले काठमाडौंका विभिन्न क्षेत्र डुबानमा परेकाले प्रहरी टोली बिहानैदेखि डुबानग्रस्त क्षेत्रमा खटिएको छ, सचेतनाका लागि बागमती र मनोहरा खोला आसपासको क्षेत्रमा नियमित पेट्रोलिङ गर्ने र माइकिङ भइरहेको प्रहरीले जनाएको छ ।
यसैगरी भारी वर्षाका कारण सडक, घर, विद्यालय क्षेत्र जलमग्न हुँदा जनजीवन प्रभावित भएको छ । काठमाडौं उपत्यकाको बूढानीलकण्ठ, सुन्दरीजल, नगरकोट आसपासमा भारी वर्षा भएका कारण उपत्यका भएर बग्ने खोला तथा नदीमा पानीको बहाव बढेको प्रहरीले जनाएको छ । विष्णुमती, धोबीखोला, मनोहरालगायतमा जलसतह बढेकाले बिहान ११ः०० बजेसम्म उच्च सतर्कता अपनाउन बाढी पूर्वानुमान महाशाखाले अनुरोध गरेको छ ।
बाढीकै कारण काठमाडौंको सामाखुसीको रेडन कलेज आसपासका बस्ती, कपनको नीलो पुल र मूलपानी क्षेत्र डुबानमा परेको जिल्ला प्रहरी परिसर काठमाडौँले जनाएको छ । यस्तै भक्तपुरको हनुमन्ते खोला छेउ रहेको राममन्दिर पनि डुबानमा परेको छ ।
भक्तपुरको विभिन्न स्थान डुबानमा परेका दृश्यहरू :-